بوتون اولاندا،آی آنجاق سنه بیراز اوخشارر

بیر اینتیظار غزلی

هایانداسان یاغیشیم،یاغ سولوب گولوستانلار

وگوللرین یئرینه بیتمیش ایندی قالقانلار

گرک دی سن گله سن چای کیمین عدالت آخا

یوبانما گل،سو کیمین آخماسین قیزیل قانلار

نه آدلا من چاغیریم بلکه لوطف ائدیب گله سن؟

دئ..هانسی یوللاری پس ایزله سین موسلمانلار

سحر کی شئح بورویور گوللرین یاناقلارینی

آچیلماق ایسته یه رک آغلاییر گومان "دان"لار

یئتیش نجات گمی سی قویما دونیا غرق اولسون

کی دؤرد طرف دن آخیر خالقین اوسته طوفانلار

یئتیش کی دونیادا آت چاپدیریر موعاویه لر

قالیب علی ایزینین حسرتینده مئیدانلار

چک ایندی ذوالفقارین،عمروعاصلار آرتیبلار

گئدیر کی بیرده چیخا نیزه اوسته قورآنلار

بوشیعه لر سولاییر گؤز یاشیلا یوللارینی

وجومعه لر ییخیلیر یوللار اوسته قوربانلار

آماندی قارتال اوچون اوچماغ اؤیره دیر سئرچه

یاساقلانیبدی گولوم،ظولم الیله آسلانلار

داغ اوسته داغ قالانیب کؤنلوموزده،قورخمالیدیر

بویون ساباح داشاقدیر آخیر بو وولکانلار

گؤتورگولن علم این سسله بیر "انالحق"ی

عربلر اولماسادا، وا دالیزدا "سلمان"لار

چیخ آی گونش یئنی دن بیرده دونیا جان تاپسین

یولوندا قوربان اولار بوللو بوللو "ائلمان"لار

 غزل مثنوی...حضرت زهرا محضرینه ایتحاف

سارالدی آی بوگون آمما دایاندی باخدی گونش

آیین،اودون ایچینه گور نئجه بوراخدی گونش

مدینه نین آیی آللاه نه حالدادیر گؤره سن

کی گؤز یاشین یاغاراق صوبحه تک اویاخدی گونش

اوزون یویاندا آیین، بیلمیرم نه گؤرموشدو

بیر عؤمر بیر قویویا حسرتیله شاخدی گونش

یاشیل چاغیندا بوگون گؤر نئجه پاییزلادی یاز

بولوت بولوت دولوبن داملا داملا سیزلادی یاز

قاپی دالیندا بیر اولدوز یئره سریب دیر آی

بو گون بیلیندی قارانلیق دا چوخ غریب دیر آی

من اؤلدو یازمامیشام حیدرین صبیر داشینا

نه آی اؤلر نه گونش...کول مدینه نین باشینا

...

قویاندا توپراغا دؤرد اولدوزون آیین بو گئجه

بولاغ بولاغ جوشوبن قبرین ایچره آخدی گونش

هامان او آی هله ایتگین دی توپراق آلتیندا

حاییف...حاییف کی او آیدان هله اوزاخدی گونش

بولوت کیمین یاغاراق سؤیله ییر هله "ائلمان"

یوبانما،بسدی،قارانلیق دی دونیا،شاخ دی...گونش

کنگره شعر عاشورایی(سرنی)

آخرین مهلت ارسال آثار:16 آذر 89
با موضوع اهل بیت(ع)-عاشورا
ارسال به www.sansiz.blogfa.com
به صورت کامنت.
یا به آدرس:خ امامیه-دانشگاه پیام نور تبریز-مجمع کانون های فرهنگی هنری.

 برگزار شد.

بیر نوحه

حضرت ابالفضله ایتحاف

دور گئتمه بئله جننته من سیز آتام اوغلو

من نئیله ییرم دونیانی سن سیز آتام اوغلو

آی گوندن اوزاق دوشسه کرک غم ییه قارداش

من ده اونوچون هئی دئییرم مرثیه قارداش

من آغلاییرام سن دن اؤتور سن نییه قارداش

چون آغلاماق اولماز کی موحن سیز آتام اوغلو

آچدی گؤزون اون دؤرد گئجه لیک آی گونه باخدی

دولدوردی گؤزون یاش یئرینه آمما قان آخدی

بیر سؤز دئدی یاندیردی او دم دونیانی یاخدی

قیزلار دوشه جک چؤللره من سیز آتام اوغلو

اوچ شؤعبه لی اوخ دوزدی دَییبدیر قاشیم اوسته

فخریمدی ولی من اؤلورم قارداشیم اوسته

من جان وئریرم سن اوتوروبسان باشیم اوسته

سن آمما قالارسان کی کفن سیز آتام اوغلو

غئیرت کانی غئیرت دن اوگون آغلادی چوخ چوخ

عرض ائتدی گؤزوم گئتدی قولوم گئتدی سؤزوم یوخ

آمما اومودوم کسدی یامان مشگه دَیَن اوخ

قوللار چابالیر خوشدی بدن سیز آتام اوغلو

حشره کیمی قان یاش یاغاسان سن اوزه "ائلمان"

آزدیر یئنه ده فیکر ائله سن آند اولا قورآن

دولدوردو سویو سؤیله دی آمما او لب عطشان

هئیهات ایچم من سویو سن سیز آتام اوغلو

بیر دؤردلوک امام رضا حاققیندا

...غریب بیزلریک(۸۵ ده بین المللی تورکو رضوی شعر جشنواره سینین اورومیه ده و ۸۶دا سراسری رضوی جشنواره سینین تهران دا و مشهد ده سئچیلمیش شعری)

حاق تانری اینسانی یاراتمامیشدان

یاراتدی بیر گوزل گونش لاب ازه ل

و اوندان اون دؤرد نور ساچدی دونیایا

اونلارین هر بیری بیریندن گؤزل

دونیانین بزه یی او اون دؤرد ایشیق

و او ایشیق لارین بزه یی سن سن

سنین الینده دیر دونیانین گؤزو

خیلقتین گؤزونون ببه یی سن سن

سنین کی کؤلگه ن وار باشیم اوستونده

ندن حشر اودوندان اوشه نم گرک...؟!

ایسته سم جننتی ایندی دن تاپام

فرش تک آستانانا دؤشه نم گرک

آقا منیم آنام، کؤرپه لیییمده

آدین قولاغیما اوخویاردی هئی

باشیمی دیز اوسته یئرقالایارکن

عشقینی خالی یا توخویاردی هئی

آی سندن قازانیر اؤز ایشیقینی

سنه گونش دئسم یئنه ده آزدی

یاغیش سان؟بولاغ سان؟دنیزسن؟نه سن؟!

سنینله یوردومدا پاییزدا یازدی

عشقینی اممیشیک آنا سوتونده

اودور کؤرپه لیکدن سنی ایزلریک

سنه غریب دئسم دیلیم لال اولسون

غریب سن دئییلسن،غریب بیزلریک

اووچونون الیندن "اوو"و قورتاران

بو غمین الیندن منی ده قورتار

سن سیز من بیر روحسوز جیسمه بنزه رم

بیر باخ یاشاییشی جانیما قایتار

منیم اوره ییمین اریش آرغاجی

غمین دیرناغیلان سؤکولور، آقا

بو سنین عشقین دیر من آغلادیقجا

گؤزدن اته ییمه توکولور،آقا

عشقین جالانیبدیر دامارلاریما

سنین چون چیرپینیر منیم اوره ییم

"تکجه بیر اوو قده ر منی ده ایسته"

بودور سندن منیم آنجاق دیله ییم

سنین بیر ساحاتین یادا دوشنده

اوره ییم اود توتور،من آلیشیرام

زامان دایانیبن گونش توتولدو

اوندا کی...

             زهه ر...

                      ...آه،نه دانیشیرام...!!!

۲ رباعی

آغزیندی پتک،بالی سؤزوندن سوزولور

گؤزلردی بولوت،یاغیش اوزوندن سوزولور

گیزلتمه داها قوربان اولوم گؤزلرینه

قلبینده جوشورسئوگی گؤزوندن سوزولور

دینمیرسه دیلین،عشقی باغیر گؤزلردن

قلبی یاشاما بیرده چاغیر گؤزلردن

گؤردوکده سنی بوغولماسام یاخشی دی...چون

چوخ دالغالی دیر،دنیز یاغیر گؤزلردن

یئنه بیر غزل،آمما بو یول یئنی بیر غزل

توضیح:"تبریزده" ردیفی نی بیرینجی دفه اوچون من یازمیشام

 ۲بیت آرتیردیم بو غزله

غزل...۵

بیر نفر وار سنین عشقینده یانیر تبریزده

بیر نفر سندن اؤتور خالقی دانیر تبریزده

سؤزوموز ایندی اسیر هر کوچه ده،هر باجادا

گؤر خبرلر نه یامان تئز جالانیر تبریزده

سینم"ارک"این دؤشو تک شان شان اولوبدور سنسیز

اودو کی دردیمی بیر ارک قانیر تبریزده

او قده ر دیلده آدین شهری دولاندیم گئجه لر

سنی حاتتا خیاوانلاردا تانیر تبریزده

هئچ بیلیرسن نه اوچون من گئجه لردن قاچیرام؟!

چون گونش یاتماغیلان درد اویانیر تبریزده

ائله روحوم دولانیر هر سحر آخشام باشینا

سانکی "شمس"این باشینا آی دولانیر تبریزده

قورخورام گؤز ده یه اوندان دی سنه گل دئمیرم

سنه هر گون نئچه عاشیق یارانیر تبریزده

تئل لرین هر گئجه مین یول داراییرسان یوخسا

هر گئجه مین دفه آی پارچالانیر تبریزده

شهریزه نور جالاییرسان،شوکور..."ائلمان"دا هله

عشقینین کؤلگه سینه دالدالانیر تبریزده

تئلین روخساریدن چک من گونه کارم شفیعیم یوخ

گؤرر زاهید سنی اعلان ائدر آی پارچالانمیشدی

                                                   "سؤنمز"

باخ بیر،یاشیلیق بیز پاییزین شاختا چاغیندا

گوللر آچاجاق عشقیمیزین قول بوداغیندا

من خیضر کیمین گزمه میشم بیر سو دا عؤمرو

چون منجه سیغیشمیش یاشاییش گول دوداغیندا

من دونیامی وئررم سنه، بیلسم کی بو عشقه

یئر وئرمیسن اؤز قلبینین آنجاق بوجاغیندا

من بیر گولوشون مؤحتاجییام گول منه آی"گول"

قلبیم چون اؤلوم نغمه سی وار قاش قاباغیندا

گؤز یاشلارینا من حسد ائتسم،عاییب ائتمه

آخدیقجا اؤپوش تک جالانیرلار یاناغیندا

آرزیم،دیله ییم دیر کی أیر قیسمتیم اولسا

سنلن دولانام قول قولا بیر آرزی باغیندا

یوز سالخیمی قالماز اوز اوزه دورسا گونشله

بیلمم کی دونن من نئجه دوردوم قاباغیندا!!!

قلبیم ایاغینلا اؤپوشن لحظه یادیندا؟

داد قلبیمین اوندان هله قالمیش داماغیندا

پاک عشقیمیزین ایثباتی گؤز یاشلاریمیزدی

من هئچ هله...باخ گؤر نه آخیر اؤز یاناغیندا

آند اولسون او قودسال گؤزونه، عاشیق اولان کس

ساتماز هوسی خالقا محببت بویاغیندا

گل قویما ساباح بوردا گزئت لرده یازیلسین:

بیرعاشیق اؤلوب دون گئجه بیر یول قیراغیندا

جان قئیدینه من قالمامیشام،جان سنه قوربان

گل "ائلمان"ی باس باغرینا، اؤلسون قوجاغیندا

غزل... ۳

گؤزلرین یاغدی چیچکله ندی بوداخلاندی کؤنول

یاشاییش ماهنی سینا بیرده ماراخلاندی کؤنول

سانکی قورآندی،قالیب تاخجادا توز باسمیشدی

کیپریگینلن نه عجب!!!بیرده واراخلاندی کؤنول

سن دیلیم لال منی آتساندا سنی بوشلامارام

او خومار گؤزلریلن چونکو آداخلاندی کؤنول

گؤزلرین دالغالانیب چکدی دنیز تک اؤزونه

یوخسا گؤرموشدوم اوزوم مین یول آیاخلاندی کؤنول

اوچماق ایستردی قاناد چالدی قانادلار سیندی

اوچدو کؤکسوم سارایی اوردا یاساخلاندی کؤنول

یازیق"ائلمان"سئوینیردین آچیلیر بیرده قوران

بوکولوب بیرداها قبریستانا ساخلاندی کؤنول

قوشما...۲

سنین گؤزلرینه دوشندن گؤزوم

سنیدین دیلیمده یالنیزجا سؤزوم

سن گئتدین،اؤلومون کؤینه یین اؤزوم

اوره یین بویونا بیچیرم ایندی

گوندوزوم قیسالیب،گئجه م اوزانیب

منی اونوتموسان،اوره ییم آنیب

اؤلومون زهه رین بیر چاخیر سانیب

سنین ساغلیغینا ایچیرم ایندی

ایستردیم خایال دان بیر قاناد آچام

هیجرانین الیندن قورتولوب قاچام

دئدیم،آللاه قویسا قارتال تک اوچام

اوچوروم اوچوروم،اوچورام ایندی

گؤزون مکتوبلارا هئچ بیر باخدی می؟

منیم چون گؤزیاشین بیر یول آخدی می؟

اورکلر سنین چون اویونجاخدی می؟

دئمه یوخ...،چون اؤزوم سئچیرم ایندی

باشیما یاغدیردی دونیا درد،غمی

غملر دنیز اولدو من سینیق گمی

کیمسه یه اچمازدیم اورک سوفره می

گؤر نئجه داشمیشام، آچیرام ایندی

قاییت گؤر نه گلیب منیم باشیما

سویوق سو قاتیلدی ایسسی آشیما

دئیرم یازارلار قبیر داشیما:

گلمه دین،دونیادان کؤچورم ایندی

غزل ۲

یاشیل یاشیل یازیرام گول آدین واراقلاردا

یاغیش یاغیش یاغیرام گؤز یاشین بوجاقلاردا

محببتین دولودور گؤزلرینده، من اوخودوم

اصالتین گؤرونور أن اصیل یاناقلاردا

أیر دئسن "سئویرم"بیرجه کلمه، جان وئره رم

گؤزوم قالیب اونوچون هئی او گول دوداقلاردا

بیراز یاواشجا دارا تئل لرین کی هر دفعه

او تئل لره دولاشان جان چیخیر داراقلاردا

عطش عطش دولانیردیم دونن داغی دره نی

کی گؤردوم اوندا سنی دوم دورو بولاقلاردا

اوزولسه بیر گون الیم اللریندن اؤلمه لییم

یادیندادیر بو سؤزو من دئدیم قاباقلاردا؟

هامان گونومدو منیم ایندی گلمسن گئدیرم

گلیر سسین گؤرورم... آمما لاب اوزاقلاردا

گل ایندی کؤنلومه سن بیر سرین سو سپ سؤنسون

یانیب سؤنوبسه ده اود٬ کؤز قالیر اوجاقلاردا